Valin'ny fitiliana faha-roa ....

Anio 25 febroary taona 2015

  Ny talata 4 novambra 2014 

Rehefa niandry teo amin'ny iray volana teo izahay,dia tonga ny andro izay handrenesana ny valin'ny fitilina faharoa izay nataon'ny vadiko.

Tamin'ny 2 ora tolokandro ny fotoana, tonga aloha hatrany  izahay, tebiteby hatrany no nisavovona tato aminay teo am-piandrasana ny fotona. Nampandroso arakin'ny mahazatra ny dokotera ka nampiresaka mandinidinika alohany hidirana amin'ny votoantony ny resaka.

Indrisy fa dia toa saika mitovy amin'ilay fitiliana voalohany ihany ny valiny. Teo koa nahafantranay fa ny azoospermia no mahazo ny vadiko. Mbola tsy naheno io anarana io aho,teny vaovao teo amin'ny sofiko io. Tsy voatanisa ny hakiviana sy alahelo nanakotsako ny foko nony naheno ilay voalaza,fanontaniana nipetraka tato an-tsaiko dia hoe Inona indray no azo atao manaraka e? Mbola misy ve ny dingana manaraka?

Misy vahaolana hatrany naroson'i Dr Cici dia ny hanaovana Biospy testiculaire  na SSR ( TESA- TESE ),io ho izy fomba manaraka azo atao raha mazoto ianareo fa  somary lafo ihany ,miakina aminareo ihany.

Inona moa ny atao oe SSR na koa Surgical Sperme Retrieval ?  : 

Alaina mivantana avy ao amin'ny testicule ny sperme amin'ny alalan'ny  fitaovana ari-fomba. Fomba hafa azo ilazana azy koa ny oe TESA- TESE 

Nazavainy aminay an-tsakany sy an-davany ny mety ho fizotran' io fomba manaraka io. Nitraka indray izaho kivy teo, satria dia toa naha-velom-panantenana be ery ilay fomba fanazavany azy.

Tsy nisy  firesahana manokana akoriny ny anay mivady fa avy dia nanaiky io dingana manaraka io, aleo velezina ny vy diany voa mahamay e! Nilaza izahay fa vonono ny hiroso amin'io dinga io. 

Ny ampitson' io ihany izahay dia nahazo taratasy izay milaza ny daty sy ny ora hanaovana an'ilay SSA.

Dia izay ny dingana vaovao hataonay, izay azo lazaina oe vahaolana farany raha ohatra ka te-hiteraka amin'ny vadiko aho...eny te-hiteraka amin'ny vadiko aho,izany faniriko goavana ato amiko, ato aminay......Iza moa no tsy manana faniriana ny hanan-janaka amin'ny vadiny e? Tsy mitsahatra aho manankina sy ny misaotra amin'ny Avo izay misy eo amin'ny fiainako,haiko fa tsy manary ahy Izy.

Isaorako anao hatrany koa ny manokana fotoana mamaky ny ny lahatsoratrako,eto no hany azoko izarako ny mavesatra ato amiko.

Valisoa

Mbola ho ny lava ny dia...

Anio faha-20 volana febroary taona 2015.

Alakamisy 25 septembre taona 2014.

       Io no andro nahafatarana ny valin'ny fitiliana nataonay,ka tamin'ny 3 ora sy sasany tolakandro ny fotona. Sady io koa no andro voalohany hifanenanay amin'ny dokotera izay hanampy anay amin'ny dia izay hataonay.

        Tamin'ny 3 ora sy faha-efany izahay dia efa tonga tao amin'ilay FA,ka niandry  tao amin'ny efi-trano fiandrasana izahay mandra-paha voantso ny anaranay, mangina tokoa tao,tena tsy nisy olona nivezivezy,ngambany samy revo amin'ny asany ny olona, na  izahay irery angambany ny olona ratsy vitana ka mitotototo mamonjy anio ivo toerana io.

       Misy latabatra iray izay feno boky teo am-povoany lay efitrano fiandrasana, ary boky rehetra teo dia toa mombany faha-mombana sy fijoroana vavolombelona hoan'izay efa nahita soa. Nandray boky ana-kiray aho ka namaky , "NAMAKY???" tsy namaky aho ny tena marina fa namadimbadika,na hoe mamaky fe mamaky, tsisy zavatra niditra tao amin'ny lohako zay tao anaty ilay boky fa "NERVEUSE "aho ,toy ny olona hanatrika fanandinana ireny, mbetika mipetraka,mbetika mitsangana,mbetika misotro rano. Ny vadiko kosa teo akilany raha jerena tampoka dia tena toy ny olona "tony" ,nefa kosa refa dinihina ela dia hita misoritra eny amin'ny endriny fa toa ahy koa izy. Nifakahery hatrany izahay roa teo am-piandrasana.

   Tonga ny tamin'ny 3 sy sasany marina,niantso ny anaranay ny Dokotera ary nampandroso anay,nampahafatatra ny tena izy, Dr Cici (Anarana noforoniko toy ny anarana rehetra eto io).Naharitra teo 20 minitra teo resadresaka vao niroso amin'ny votoantony filazana valiny analyse izy. 

Toy izao valiny fitiliana natao.

NY AHY :

-salama tsara,

-tsy misy aretina avy amin'ny firaisana ara-nofo,

-tsisy olana tranon-jaza, ary tsy atahorana ny ho lany atody  fa kosa mila ampiakarina  kely ny lanjako, ary mila manao vakisiny fanefitra amin'ny rubella .

NY AZY: tsy haiko ry mpamaky hanjaina ny hanombohana ny resaka eto ,tena marina tsy te hanotra valiny eto aho, ifonako fa tsy sahy aho e!tena tsy sahy aho ngambany azonao an-tsaina valiny. 

       Dokotera kosa nampahery anay ka nilaza oe haverina ny fitiliana an'i Jones fa sao dia mba sationan'ny tsirinaina natao fitilina no tsy ampy. Nanome fotoana sy adiresy hanaovana fitiliana manaraka Dr Cici . Afaka 1 volana indray fotoana manaraka halalalana ny valiny.

   Hery lehibe hoahy hatrany ny maheno ny dokotera nilaza fa haverina fitilina, amiko mahatoa dokotera tsy mbola manasa tanana dia misy ihany fanantenana. 

   Io andro io no andro mafy indrindra tamiko,satria tsy nampoiziko valiny, Eny e! mahatoa tsy nisy ny vohoka hatramin'izay dia nisy ny olana fa tsy nampoiziko hoe hotrizay ny valiny,toa manofy aho , tsy nino mihitsy aho,niveriberina tato an-tsaiko oe fa nahoana re? ngambany mba diso kosa ny dokotera ...? Na teo ary zany olana izany dia tsy nataonay handravana ny fitiavana izany fa nifakahery hatrany izahay mivady,matetika ny vadiko no mifona amiko,mihevitra mantsy izy fa diso ,nefa aho kosa dia tsy manome tsiny azy,tsisy hadisoany velively izany.

Tsy kivy aho fa vonona hanohy ny dia, ary haiko fa Andriamanitra tsy handao anay fa eo hatrany. 

Misaotra anao aho namaky ny lahatsoratrako androny. Raha mahaliana anao dia mametraha hafatra.


Valisoa

George Chakiris

Ny dingana voalohany ...

Alakamisy faha 19 volana febroary taona 2015

      Somary manerikerika ny andro ao ivelany ao,tsy maha te-hivoaka ny trano mihitsiny,manana fotona kely aho ka aleo manoratra, satria te-hizara aminao aho ny tohiny dianay .Ny lahatsoratrako androany dia  mikasika ny dingana voalohany nataonay momba ny antony tsy mbola mahatateraka fanirianay mba hanana zanaka.

   Efa resahiko tao amin'ny lahatsoratrako omaly fa rehefa niresaka tsara izahay mivady dia tapaka ny kevitra fa  hiantso ilay Fertility associates amin'ny tana-dehibe amin'ny toerana misy anay. Ny antony nahatonga anay nifidy io FA io dia nohon'ny traikefa maro izay ananandrizareo ao.

Alarobia 13 aogositra 2014 :Niantso ny FA izay, naharitra teo amin'ny 15 minitra teo ny resaka,satria nisy fanontanina maro napetrak'ilay mpandray antso ataroby taminay toy ny:

-efa hatramin'ovina no nanandrana ny hitoe-jaza? ( TTC)

-mifoka sigara ve?

-misy zaza latsaky 12 taona ve ao an-trano?

-Efa bevoka ve taloha ...sns...

maro ireo fanontaniana napetrany fa tsy tadidiko daholo,ary farany moa dia nangataka adiresy sy anaranay feno izy.

Zoma 15 aogositra 2014 : nahavoaray fonosana avy amin'ny FA izahay, tao anaty ilay fonosana, dia nahitana :

1- boky iray "Pathway to a child" , izay hita ao anatiny ny tohatra izay harahina amin'ny fitsaboana ny faha-mombana,ny resaka momba IVF,DO,IUI .

"Pathway to a  child"

Pejy miresaka momba ny Fiv

Ireo lohateny maro ao amin'ilay boky

2-taratasy anan-kiroa ,miampy valopy misy adiresy FA ,lay taratasy dia mirakotra fanontanina maro, ary mila valina sy atao sonia, ka averina amin'ilay adiresy voasoratra eo valopy refa vita.

3-Nisy taratasy anan-kiroa hafa tao ka misy ny lisitra ireo fitilina ( analyse) izay hataonay mivady. Marihiko fa samy hafa zavatra takina amin'ilay fitilina.(sambako tamin'ny fiainako vo hanao analyse mitaky zavatra maro be zany). 

4- Takelaka iray mirakitra ny vinavina vola mety ho lany.

Treatment fees 

5-Farany dia taratasy iray misy ny daty sy ora hihaonana amin'ilay Dokotera ny FA ka eo hahalalana ny valin'ireo fitilina .( Ny valin'ny fitilina rehetra dia mivantana any aminy, ka amin'io fotoana voatondro io izahay vo afaka hihaona aminy)

       Somary feno hakiviana tato amiko nony nahita ireo mari-bola zay mety ho lany,na dia mbola tsy haiko aza na hatraiza ny hiafaran'ny dianay,fa nataoko tato an-tsaina dia oe "vonona  aho" vonona hanohy dia,sy hanantanteraka ny fanirianay na dia handaniana vola ama-karena aza izany.

     Ilay boky 'Pathway to a child" kosa dia tena boky mahalina, satria miresaka dingana sy vahaolana momba faha-mombana. Ny andro nazahoako an'ilay boky dia toa tsisy zavatra vitako fa dia namaky hatrany ilay boky,navadika navadika toa ho hitako ao valin'ny fanontaniana oe "mba ho reny ve aho?"

      Mbola mitohy ny dianay,  ka hataoko ao amin'ny takila manaraka ao tohiny , isaorako sahady i Anao mamaky hatrany,aza hadino mametraka hafatra na manontany raha misy mahaliana.

         Misy voambolana maro ireo ambony ireo izay tsy hitako hamadihana azy amin'ny teny malagasy fa kosa hazavaiko arak'izay fahaizako azy.

IVF: In Vitro Fertilisation , lonahina aty ivelan'ny vatana ny tsirin'aina lahy sy atody vavy.

IUI : Intra- Uterine Insemination ,izany oe, ampidirina mivantana ao amin'ny tranon-jaza ny tsirinaina lahy.

TTC : Try To Conveince 

FA: Fertility Associates

Am-pitiavana 

Valisoa 

xoxo

Ny momba anay.

Anio faha 18 volana febroary taona 2015.

       Androany aho dia hampahafatatra anao bebekokoa ny momba anay. 

Valisoa ny anarana ho entiko eto amin'ity blog ity, handray 33 taona aho antsihoantsy.Mpiompy ny asako, mimpetraka aty ivelany aho, efa ho 4 taona izay. Mipetraka amin'ny toerana lavitra tanan-dehibe izahay,azo isaina ny olona mba hita ao anaty iray andro.Manana alika roa aho, dia i Boy sy Baba,ireo mba solon'ny zaza ao ato an-trano (vazivazy ny ahy).

 

Izy no "baba"

   Tamin'ny faha-25 taonako aho dia nitoe-jaza tamin'ny sakaizako taloha ,ndrisy kosa anefa fa tamin'ny faha-5 volana sy 15 andro ny kiboko dia afa-jaza aho ny Alatsinainy faha 19 volana novambra taona 2007,mafy tamiko io sendra io fa kosa tsy irery aho fa teo Andriamanitra nampionona foko.

    Tamin'ny taona 2009 aho nifanena tamin'ny Jones, ary nanomboka niara nipetraka izahay ny taona 2011,ny taona 2013 izahay no nanao voady fa hiaraka ka hizara soa indrindra, ary hiaraka na mafy na ho sarotra ny dia.

    Nahatsapa anefa izahay fa misy banga teo fiainanany dia ny tsy fisiany "zaza" tao an-trano. Nandritra ny fotoana niarahanay nefa dia toa tsy mba nisy volana na taona mba honohono fa nitoe-jaza aho. Manontany tena izahay satria izahay dia tsy nampiasa fomba fandrindrana fiainam-pianakavina,na pilina na tsindrona izany. Ny marina kokoa dia izaho dia mbola tsy nampiasa an'ireny mihitsiny tamin'ny fiainako fa manisa andro nahavanana ahy kokoa.Lasa ny eriteritray, toa lasa mifampiahiahy izahy, "izy ve sa izaho e?"

    Etsy akilany,ny havana sy namana amin'izany toa manontany saika isaky izao mba miresaka izao "Fa amin'ny oviana ndry kia miteraka? Nga kia ndry tsy hiteraka? Fa misy olana nga kia?....manindrona foko mafy ireo fanontanina ireo, eny fa na dia mbola tsy voporofo aza fa misy olana eo aminay, hany ataoko matetika dia tsy mamaly fa mitady zavatra hafa hanovana ny resaka.

    Noho ilay fanirina te-hanan-janaka anefa dia tsy ninjanona fotsiny izahay fa manantona  ny Fertility clinic izay havanana amin' io sehatra io satria io hany vahaolana voalohany hitanay fa afaka hamaha sy hamaly ireo fanontanina izay tsy ahitam-baliny ireo. Mety manontany tena ngambany enao " 2 taona ve dia efa ampy hilazana fa misy olana eo aminareo?" 

    Hozaraiko ao amin'ny takila manaraka ny dingana rehetra hataonay, mino aho fa mahaliana izany.

Mizaotra anao  hatrany aho namaky.

Valisoa

    

     

Tonga soa eto amin'ny Blogn"i Valisoa .

Anio 17 Febroary taona 2015

       Androany aho dia nanokatra ny blog " Ho reny ve aho indray andro any?", misy fanirina mafy ato amiko,maniry mafy aho ny ho RENY,indry mantsy ,tsy vitanay mivady irery zany fanirina izany fa tsimaintsy miakina amin'ny SCIENCE zahay. Ary izany rehetra izany dia Andrimanitra mahalala ny mahasoa anay. Efa natoky azy aho hatramin'ny voalohany ary mbola mino sy matoky fitantanany ahy amin'ny dia izay hataoko.

     Haiko fa misy vehivavy malagasy manana olana tahaka ahy,  nefa tsy sahy ny miresaka satria matahotra ny esony fiaraha-monina, Izaho koa dia toy izany, misy fatahorana ato amiko ,nefa mba te-hizara ka izay no namoronako ilay solonanarana "Valisoa".

    Nataoko koa ny blog mba hanamavainako ny alahelo izay mitambesatra ato amiko,sy mba hizarako zay mba fahalalako sy handrefesako ny lalana ho diaviko.

   Ialako tsiny mialoha raha mifangaro amin'ny teny vahiny ny voambolana hampiasaiko eto,ary mialatsiny koa aho raha misy ny tsipelina diso eny anelanelany eny fa tsy dia mahay miresaka firy mantsy aho,fa kosa hiezaka aho hanao fehezan-teny fohy ary mazava.

Misaotra anao mialaho ny namaky sy manaraka ny asasoratrako

Afaka mandray anjara enao amin'ny alalan'ny fametrahana hafatra.

Am-pitiavana 

Valisoa